Pathian duh zawng i ti ang u

- Laldinpuia

“Lalpa, Lalpa mi ti nazawng chu van ramah an lut lovang a; ka Pa vana mi duhzawng titu erawh chu an lut ang” (Matthaia 7:21)

Ringtute vanneihna ni a kan sawi thin chu chatuan nunna kan neih a kan thih hnua van ram nuam tak kan thlen tur hi a ni a, hei hi ringlo mite laka kan danglamna a ni. Lal Isua ringtu, Kristian te chuan nakinah kan thih hnuah van ramah kan kal dawn tih kan hria a, chuvang chuan kan thih hnua kan nawmsakna tur thlirin chhel taka Pathian rawngbawl turin kan infuih thin. Amaherawh chu Lal Isua kan rin leh kan thih hnua vanrama kan kal tur thu kan sawi uar viau lai hian hemi thlen hma, kan dam laia kan tih tur pawimawh tak mai hi kan hlamchhiah fo thin. Chu chu Lal Isua thu zawm/Pathian duh zawng tih hi a ni. Hei hi tunlai huna Kristian ten kan hlamchhiah thin a ni. 

Kan rama ringtu tam tak hian Pathian thu zawm peih si lovin a chhandamna chauh kan duh a, Pathian kan fak a, a ni kan serh a, mahse a thu kan zawm thin si lo. Thil diklo tam tak kan ti a, Pathian duhloh zawngin kan awm thin a. Mahse chute chung chuan Pathian kan fak a, kan thla a muang em em ringawt mai a. Mahse kan thla a muang sual ang tih erawh a hlauhawm thin hle. Lal Isuan van rama lut theilo tur a sawi zingah hian kan tel ang tih a hlauhawm thin khawp mai.

Kan ram dinhmun han thlir i la, lungawina tur a vang thin khawp mai. Kan ram kalphung a fuh hlei thei lova, sualna tam takin hmun a luah mek a. Mi hausa te hausak chhan a dik lova, mi rethei te retheih chhan lah a dik hek lo. Dan kalha thiltihna kan ramah a tam em em mai a, heng vang hian mi tam tak an rum a, ram leh hnam hmangaihtute rilru a na hle a ni. Hetiang khawpa kan ram rum nachhan hi kan politics kalpui dan dikloh chu ni bawk mahse a chhan dang pawimawh tak chu Kristian ten kan tih tur kan tih loh vang leh Pathian duh zawng kan tih lohvang a ni. Kan rama ringtute hian kan ram sual mekaah hian mawh kan phur a ni. Kan rama ringtute hian Pathian thu angin nung ila, Pathian hi tih ila, kan ram rumna hi a reh ngei ang. Ringtu mahni hmasial kan tam lutuk avangin mi chanai  kan eiru duh a, mi rethei te chanvo tur pawh kan pawhpensak duh ta zel mai. Ringtuten kan mawhphurhna kan hlen loh avang hian kan rama Kristianna hian sawisel a hlawh phah ta fo reng a ni. A pawi hle mai.

Pathian ringtute hi kan inenfiah a tul ta hle a ni. He kan ram a sualna hrang hrang, diklohna hrang hrang te hneh a tibo tur chuan Pathian duhzawng anga kan nun kan hman a ngai a ni. Tunlaia kan rama kan buaina leh harsatna tam tak hi Kristian state a thil thleng atan chuan a duhawm lo thin hle a ni. 

Hawh u, he kan ram leh hnam a dam leh theih nan hian Pathian ringtute hian Pathian duhzawng i ti ang u. Lalpa Lalpa ti nazawng hian van ram an thleng dawn lo. Van ram thleng thei tur te chu Pathian duhzawng titute an ni(Matt 7:21). Chatuan nunna kan nei duh anih chuan Lal Isua ka ring, Kristian ka ni, ti satliah ngawt lovin kan nun hian lan tir se la, kan tih duhzawng hi Pathian duh zawng ni rawh se. Ringtu tam tak ten kan thlamuan mekna hi thlamuanna dik a ni em tih te hi i inenfiah fo ang u. Kan rama sualna a bo theih nan te, eirukna leh hlemhletna, dan kalha thil tihna zawng zawng te a lo bo theih nan kan rama ringtute hian Pathian thu zawmin Pathian duhzawng i ti theuh ang u.

10.02.2022