Covid 19 - ‘International Hritlang’

- Laldinpuia

 

Feb 4, 2022 thlengin khawvel mihring 5,743,098 in an thihpui tawh a, India mi 501,143 in an thihpui tawh a, Mizoramah ngei pawh mi 617 laiin an thihpui tawh. Hetiang khawpa khawvel mihring tam suattu hi hritlang satliah ngawt chu a ni lo deuh a ang khawp mai. Sawrkar pawhin a buaipui a, hei vang hian mipui te pawh hian he hri lakah hian kan fimkhur hle a tha awm e. Hritlang satliah ti a kan pal zam mai mai lai hian mi tam takin an thihpui mek avang hian pawngngaw ngaih zam ngawt theih a ni lova, hritlang satliah inveng fimkhur ngai takah tal kan dah a tha ang.

 

Inkhuahkhirhna:

Kum 2020 atangin Lockdown thawm kan hre tan a, Mizo te chu khawvela Lockdown rei ti a hriat lar kan ni a, mahse kan in Lockdown rei ngaihtuahin hri hi kan chhu chatin kan khuahkhirh chuanglo tih erawh a chiang. Dan, zawm loh pawha hremna awm lem lo, a hminga tihchhuah satliah ang deuhah mipui te hian Lockdown inkaihhruaina hi kan ngai tawh a maw ni chu aw tih tur a ni tawh niin kan nunphung thlir hian a lang.

 

Tunah pawh sawrkar lam chuan inkhuahkhirhna thar an tichhuak leh ta a, kan inkuahkhirhnaah chuan a inziak chip chiar tha khawp mai. Mahse he dan duangtute hian an thlir dan hi a rualkhai lo deuh em aw, tih a ngaih theih thinin ka hria, awl sam taka ‘phal a ni’, ‘phal loh’ ti liam ngawt lo vin ram puma khaw hrang hrang ina kan tawrh dan leh darh dan mila inkhuahkhirhna thlahdul emaw herrem emaw a awm mumal lo hle niin a lang. Hetianga kum 2 chuang Lockdown inkaihruaina inang deuh put puta thla a thara tihchhuah leh ringawt thin hian mipuiah sawrkar thuchhuak ngaihzamna leh ngaih pawimawh tawk lohna ‘thuchhuah awm mah se kan zawm leh thei chuang lovang,’ ‘engtin mah action lak a awm leh lovang’ tih vel ngaihdan tha lo tak a siam phah mek niin a lang a, chuvang chuan kan inkaihruaina dan siamtute pawh hian a ram pum huap emaw AMC area leh a pawn anga khairual tawp lemlo hian a khawbil/District a Local Council/Village Council te thuneihnaah dah thiam pawh a tul hle tawh a ni.

 

Dan leh thupek hi sawrkarin tha taka a kenkawh hian mipui te chuan kar lovah kan zawm mai a, a kenkawh siloh hian mipuiah inthlahdah a a tuh a, chu chuan dna pawisak lohna leh palzut hreh lohna a thlen thin.

 

Kan la fimkhur tawklo:

Sawrkarin fimkhur turin mipui a zirtir thin a, mahse mipui lamin kan zawm tha lo. Kan khawlai nunphungah kan zawm tha lo a, mahni invawn fimkhur naah kan zawm tha lo bawk. Hetih lai hian kan sakhaw biakna inkhuahkhirhna ‘Inkhawm phalloh’ erawh kan zawm tha thung hle. Fimkhur tura hma latu Health Department lam pawh an fimkhur tawklo deuh em aw tih tur a awm ta fo mai. January 12-ah Guwahati atangin Aizawl panin NETWORK Bus in kan haw a, Vairengte daiah min lo tidingin Rs 100/- chawiin Passenger te chu Ragt test min neihtir vek a, kan chuanpui zinga pakhat chu a Positive tih hmuhchhuah a ni hlauh mai a. A pawi hle, an khung hrang dawn nge, engtin nge an tih ang? ti a kan ngaihtuah mek laiin anmahni a test tu te kan han be rawn a. Anni chuan ’Tikhan Aizawl thleng chu chuangho mai rawh u, Guwahati atangin in rawn chuang ho tawh tho a, a pawi tawh chuang lo, Aizawl in thlen hunah a in quarantine mai dawn nia” an ti a. Vairengte a in test Negative te pawh chu Positive te nen motor pakhatah Aizawl thleng min khungkhawm leh ta tho anih chu. Keini chu kan Negative avangin Negative result chu min pe turin kan dil a, mahse min pe theilo a, Negative result VLTF a show tur in duh chuan in thlen hunah in test tha leh mai dawn nia’ an ti mai a. Vairengte a Rs 100 chawia kan in test kha awmzia a va awm tehchiam lo em, a positive a an khung hrang chuang si lova, Vairengte leh Aizawl inkar raltiin motor ah min chuantir dawn anih hi, kan ti hlawm a.

 

In test tam hi hri darh tur venna tha a ni:

Covid 19 laka kan indang hlei thei lo a, a hri darh zel kan venna tur chu test tam a a Positive apiang khung hran hma hi ni ta berin ka hria. Mi tam tak a sympton nei ngei ngei te pawhin an test loh fo nachhan hi an Positive chuan mi ten an thinhrik ang tih an hlauh vang niin ka hria a, kawng dangah chuan a test man Rs 100/- lai pek a ngaih vang a ni. Insawiselna nei leh inringhlel te hi chu sawrkar lam hian a thlawn in test zel thei se. A mipui nawlpui chuan a thlawn anih avangin kan bawh huam huam lem chuang lovin a rinawm(hnar hawlh hi a na em mai, a nazawng tan a zawngchhang thlak loh :)). Kei pawh in test ka huphurh hle a, test loh hram ka duh a, mahse ka symton neih hi tum danga hritlang satliah a ni lo tih ka hria a, hreh tak chungin midang ka kai zel loh nana ka fimkhur theih nan ka in test a, ni 4.2.2022 khan ka positive tih ka hmuchhuak ta ngei a ni. In rinhlehna nei te chuan midang kan kaichhawn zel loh nan in test hi i uar ang u.

 

Covid Sympton:

Mi tam tak chuan Covid lan dan kan hre chak a, a vei ten an tawrh dan kan hre chak hle thin. Keimah bikah he natnain ka taksa a nghawng dan ka han tarlang ve zawk teh ang. February 3 zing atangin ka hritlang deuh a, chhunah nilengin ka hritlang awm nuam lo, hrawk tawt in min tham a. Mahse Tun hmaa hritlang satliah ang deuh kha a la ni. Hritlang Damdawi te ka ei a, a sawt lem lo. Feb 3 zanah zankhuain hritlang hnar ping ka nei a, zing lamah ka khua a sik ser ser. Chhunah ka in test a ka lo Posiyive ta ngei a ni. February 4 zanah hian ka hrawk a thipin ka hritlang a pik hle a, ka khua a sik ser ser deuh reng bawk. Ka hrawk thip dan em em hi hritlang satliah ang kha chu a ni ta ngawt lo, ka khuh hian a thip em em a. Tin ka kawng hi a na em em a, kawng in herh kal tha theilo ang mai hian ka thut hian a na leh zawk thin a, ka mutin mahni a thawh mai a har hle. Heng hi keimah a Covid 19 in a hnathawh dan chu a ni.

 

A khaikhawmna atana ka sawi duh chu he Covid 19 hi a mah nena han chenho chiah chuan a zuamawm lem loh. Hritlang satliah ngawt chu a lo ni lo. A nghawng hi a lo na ve zek a ni. Mahse a hlauhawm hran lovin ka hria, chi aina tur engmah a awm lo. A pawimawh berah chuan sawrkar thuchhuah te kan zawm hi a tul hle a. Tin kan sawrkar leh thuneitu lam pawhin he hri avanga pawngpaw in khapbet ngawt lova he hri leng chung pawha nungphung a buai loh dan tur kan ngaihtuah a hun tawh hle a ni. Thianpa Papuia tawngkam takin he ‘International Hritlang’ hi kan nunphung tibuaitu leh min tithuanawptu ni lova kan nunphunga bet ve anga kan thlir thiam a tul ta hle a ni.

 

05022022