Tunah hian zirlai te tana Scholarship hrang hrang dil a hun leh mek a, zirlai ten an dil leh mek bawk a. Mizoram sawrkar hnuaia Mizoram Scholarship Board ina an ruahman Tribal Scholarship pawh zirlai tam takin an dil mek zel a ni. Scholarship chungchangah hian ka lo hriat ve zul reuh avangin kan College chuan incharge ah min ruat a, kan College student te Scholarship dil, lo enfiah leh lo verify zawng zawng chu ka hna a ni. Tribal Scholarship dil thei chin hi kum khata chhungkaw sum lakluh Rs 2,50,000/-(Nuai hnih leh singnga) tlinglo chin a ni.
Hemi chungchangah hian vawiin(19.11.2021) tlaiah zirlai chhungte atangin phone call ka dawng a, min rawn phone tu chuan tihian a rawn ti a, ".... College Scholarship lam incharge i ni tih ka lo hria a, kha ka fapa khan ka hriat lohin Scholarship a lo dil ve a ni awm a. I hriat angin sawrkar hnathawk ka ni a, kum khat chhunga ka hlawh hi Rs nuai 10 vel a ni ve a, chuvang chuan diklo taka thiltih hi ka duhlo a, chuvang chuan scholarship dil hi ka phal ngailo a. Mahse a thian ten a dil theih tho alawm an tih avangin a document alo submit a ni awm a, Income ah khan a dil thei tur anga an lo ziak tlem a, Income Certificate a lo awm anih pawhin khawngaihin lo approve lo hram rawh u. Scholarship hi kan income angah hi chuan kan dil theilo a, diklo taka tih hi ka duhlo a ni. Chuvang chuan khawngaihin kan faten ka hriatlohin an lo dil anih pawhin lo approve lo hram rawh" tiin min rawn ngen a.
Hetianga min rawn ngenna ka hriat hian min ngentu hi a fakawmin a ngaihsanawm hle in ka hria. Min ngenna hi ka pawm zawng tak a ni bawk a, zawm a nuam hle mai. Tunlaiah mi tam ber chuan sawrkar atanga sum kan dawnna tur anih phawt chuan dikhlel deuh pawh nise dan kalha thiltih hi kan ching chho ta hle mai a. Sum ngainatna hian kan rilru leh ngaihtuahna a hruai sual tawh ni berin a lang. PATHIAN in engtin nge a ngaih ang? tih lam kan ngaihtuah tawh lem lo, inthlahrung hauh lovin kan sum lakluh kan zep then a, sual kan palzamna kawngah kan inthiam chawp a, keimahni tana tha leh kan zawm theih chinah Pathian thu pawh hi kan pawm deuh mai niin a lang. Hetiang khawvela kan khawsak mek laia dik taka thil ti duh, thil diklo haw ngam, mi huaisen kan nei hi a lawmawm hle in ka hria. Ani chuan kan ram mipui ten kan nghahhlelh em em kalphung thar hi a lo chen tan der tawh niin ka hria.
Tunah pawh hian zirlai naupang scholarship dilna tam tak enfiah turin ka kawl a, mi thenkhat te chu ka hriat chian an nu/pa pawh sawrkar officer te, sumdawng lian tak te, eizawnna lian leh hlawk tak nei mek te pawh an ni. A then chu sawrkar officer ni chunga Kohhran rawngbawltu te pawh anni. Mahse an Scholarship dilna a an annual income erawh a tlem hlawm hle, an thlakhat sum lakluh vel emaw lek annual income a rawn ziak te pawh an awm. Mahse DC atangin mumal takin income certificate an nei ve thlap bawk si. Hei hian kan ramah thil diklo a tam tawh zia a tarlang chiang hlein ka hria.
Kan ram kalphung siamthat hi kan politician te , kan rama rorelna kengkawh mek tute, Kohhran hruaitu leh khawtlang hruaitute kutah chauh kan dah thin a, hei hi a dik lo a ni. Mitin hian mawhphurhna kan nei, THUDIK HI TAN ILA, KAN CHAN DAWN ANIH PAWHIN HUAISEN TAKIN DIKNA AVANG HIAN RETHEIH INHUAM ILA, CHAN INHUAM ANG U. Chu chuan kan mimal nun a siam tha ang a, kan Kohhran nun a siamtha ang a, kan khawtlang leh ram a siam tha ang. DIkna avanga kan channa chuan kalphung thar mitin ten chanvo leh chanai kan neih theihna kalphung tharah min hruai thleng ngei ang. Chutih hunah chuan dikna kan tan avanga kan lo hnawl tawh zawng zawng te chu kan thawhrimna rahin hlim takin kan la seng thung ang. Chatuan nunna nen.
- Laldinpuia (19112021)
No comments: