Ramri Duty na hmunah zan 3

'Serchhip District a ramri a Covid-19 duty te hi an hah tawh em mai, i pui ve ang u,' tiin Sub Hqrs YMA Serchhip in a rel angin May 11-13 chhung khan a pui turin a thawh khatna Team ah tel vein Lungkawlh lamah kan kal a(Serchhip District hian International Boundary with Myanmar hi Sailulak leh Lungkawlhah kan nei). Ramria ram leh hnam a him theih nana ka duty ve theihna tura hun remchang tak a awm hi ka lawm hle a, tih theih nei tamlo mah ila, he Covid-19 laka kan ram a him theih nan theihtawp ka chhuah ve na kawngah hun harsa leh hreawm ka hmachhawn thei tur hi ka tan chuan thil thar a ni.

Kawng awlsam a nilo:
Lungkawlh lama duty kan ni a, kan duty na hmun hi Lungkawlh khua atangin minute 30 vel Pick up in kan tlan a, kawng a tha lo hle. Lungkawlh YMA ten duty te riahna tur Buk nuam tak mai an lo sa a, an inpekna a fakawm hle. Kan sawrkar lamin Police fel tak tak duty in an lo dah bawk a, Police duty te hi 5 an ni a, ralthuam tha mi, AK 47 nen an duty rup mai a, a ralmuanthlakin a ngaihthatthlak hle.
Lungkawlh Task Force lam atangin mi 2(Pu Chhunga YMA President leh Tv Sangtea, YMA Asst secy) in min duty pui bawk a, keini lam 4(Pu Sanga, President Sub Hqrs YMA Serchhip, Pu Maduhawma, Pu Muana leh kei) kan ni a. Chaw chhumtu an rawih nen kan vaiin mi 12 bukah kan riak. Kan Police leh Task Force te nen May 12, 2020 ah Tiau luia Burma leh Mizoram inrina hmun panin kan kal a, anmahni sawi dan chuan, a hla lutuk lo an ti a. Ngaihtha takin kan kal ve mai a, mahse rin aiin a lo hla hle mai. Tiau lui hi Km 4-5 bawr vel a ni ang kan buk awmna atangin. Kawng a awm mumal lova, kham pangah kawng zawng chawp titih in a hma lama kan police ho lo kal tawhna hlui kawng te kan zawng chawp a, chutiang chuan rei tak chhung Tiau lui pana kan chhuk hnuah kan zuk thleng ta a. Kal lamah pawh keini ang chu kan chau nghal der mai. Haw lam phei chu kan kalna lama haw leh kan huphurh tawh lutuk a hmun dang atanga haw kan rawt hial mai, kawng dang atang chuan kan haw ta ngei a, mahse a hahthlak tho!

Miten tunge a ni min tih?:
Tiau lui ral lehlamah hian Burma mi pakhat Dawn khua lenkhang zar tura a kal hi kan hmu a, kan au a, Mizoram lamah rawn kai lo tur leh midang pawh rawn kailo tura hrilh turin kan ti a, ani chuan a kai loh tur thu a sawi a. In rawn kai chuan kan kap che u a ni mai, ti tein kan han vau vel a, chutah chupa chuan, "Keini chang hi min ti bik a, Cherhlun lam pawh an rawn kai awllo a in hau ngai bik si lova, keini min hau ziah bik a, enge a awm zia?" tiin min chhuahchhal let ve ta tlat mai a. Keini lam chuan anni pawh kan lo hrilh dawn nia, tumah inkaitawn rih loh tur, an lokai lui anih chuan lo vawm hrep ru, te kan ti a. Rilruah chuan midang chunga dan lekkawh kan tum viau lai hian keimahni lam hian dan kan zawm that loh thin hi midangin an lo hre hle mai, tih ka rilruah a lo lang nghal a.
Tiau lui dung kan zawh chhung chuan vawi 4 vel bomb puak ri kan hria a, Cherhlun lamin Sangha an bomb thin a chumi anih an rin thu kan kalpui te chuan an sawi a. A chhak deuhah Burmi mi dang kan hmu leh a, lui kam lehlama awm an ni a, kan au a, Covid-19 buai chhung chu Mizoram lama rawn kailo turin Lungkawlh YMA President chuan kan hriatlai ngeiin a au a. Lungkawlh khua hi an fakawm hle, Covid-19 avang hian an inkharkhip hneh hle a, kan duty na hmun hi Lungkawlh leh Tiau inkar Burma lam leh Lungkawlh lam inkalpawhna hmun kawngah a ni a, kan duty chhung hian a khawilam ve ve mah inkalpawh an awm miah lova, hauh ngai pawh an awm lo. Anni ang hian Mizoram hmun tina duty te hian khauh takin in khuahkhirh vek thei ila a thlamuanthlak hle ang. Lungkawlh leh Dawn(Burma) hi khaw inthenawm an ni a, chhiatni thatniah pawh an inlenpawh reng thin a, nupui pasal te pawh an inneih pawlh bawk a. Mahse Covid 19 avanga an duty atang hian tuman intlawhpawh an phallo a, an unau leh thiante ngei ngei pawh kan ram(Mizoram) a him theih nana an hnar ngam a, Lungkawlh khuaa kallo tura kan hriat lai ngeia an ti kha ram leh hnam hima tura an inpekna kha a fakawmin a ropui ngawt mai. Ka chhuang hle a ni.

Kan sipai huaisen te:
Khaw chhung lamah Local Task Force kan hmu lian hle a, kan sipai te pawh kan sit lek lek emaw tihtur khawpa tawngkam han hriattur te pawh social media lamah hmuh tur a awm leh zeuh thin. A langa comment tha duh si lova a ruka zutzungpui kan lo tih pir ve chang pawh a awm nual mai! Mahse Lungkawlh daia kan duty atang hian kan ram sipai te ramri a an lo tangkai zia leh kan thlamuanpui zia ka ngaihtuah a, an hnathawh a ropui hle mai. An sipai uniform thuam famkim ha chunga silai chhuanvawr AK 47 ak chunga kan hmaa an han kal thoh thoh mai hmuh te hian thla a muang ngawih ngawih mai. Lungkawlh a duty te ngat phei chu Tiau lui a patroling an zuk neihna kawng hreawm zia leh hlat zia a hmuhpuitute kan ni a, ram leh hnam tana an hnathawh hi a ropuiin an fakawm hle a ni. Ramhnuaia kan himna tura an rammutna hian ramchhung mipuite thla an timuang hle a ni.

Hrechiang lova insawisel kan ching:
Mizo te hi thil hrechiang lova insawisel kan ching hle. Hei hi kan thatpui aiin kan hnam hian kan chhiatpui a, tul lovah harsatna kan insiamsak fo thin niin a lang. Ramri a duty hi kan chak fahran lo, Mizo tlawmngaihna avangin hlawh nei lovin mahni hna tul kalsanin ram leh hnam tana kan tih theih tawk... ti rilru pu chunga kal hram hram kan ni. Tin tunlai chu Malaria te a hlauhawm a, ram hnuaiah phei chuan thosi a tam si. Ramriah hi thil nuam a ni hauh lo. Tuna zan 3 kan riak pawh hi kan thosilen ken kha Medical Dept min pek a ni a, Thosi proof chu a ni na a, Vaihmite a lo proof hauh lo mai a, zan 3 chhung chu vaihmite seh avanga taksa inveng reng rengin hun kan hmang! Haw hun kan nghakhlel zek zek zawk a ni.
Hetiang anih lai hian kan duty zo kan haw lamin N. Vanlaiphai a dawr pakhatah thil kan lei a, kan thil leina dawr neitu nu chuan kan kalna te min zawh a kan sawi hnu chuan, "E ni tak maw, hmanniah pawh Cherhlun lama ami ten Sangha an bomb a, an man hnem khawp mai a, duty te hian sangha an man deuhreng mai a, chuvang chuan duty pawh an inchuh hial an tih kha. Serchhip lam pawhin luidunga sangha an man duh chhuanlamin duty an rawn chuh anih dawn hi, kan tia kan lo nui vak vak asin" min ti ta mai a. Ka thin a sa phat mai, mahse tawngkam vin erawh hmang lem lovin, "Ka pi chutianga luikal chak vanga duty kan ni awzawng lo, peih lo chung chungin ram leh hnam tan ti a rawn duty kan ni asin, sangha man te chu sawiloh, a hman pawh kan hman lo reng reng. Tiau luiah Burma ho Mizoram an lo luh loh nan hah takin kan zuk duty asin" ka ti let ve ta ngat a. Kan kal chhan loh ang taka chutianga boruak a lo awm mai chu a pawi ka tiin rilru pawh a tina ngei mai. Mahse kan tihchhan kan hria a, kan ram, kan hnam himna tur atana ti kan ni a, miten min sawichhiain kan nihlohna angin min puhmawh thin mah se kan ram leh hnam himna tur atana kan tih theih tawk kan ti ve a, keini lam chu kan lawm ve khawp e. Kan ram leh hnam tana theihtawpa chhuaha ramri leh ramchhunga thahnemngai taka duty te avang hian kan ram hi a la him hram hram a ni si a.

- Laldinpuia (14/5/2020)