State Bank Rewardz hi i hmelhriat ngai em?

Consumer te i harh ang u - XIV

Tunlai khawvelah hian ATM Card leh Internet Banking kaltlanga pawisa inhlanchhawnna Cashless transaction hi kawng tam takah hman anih tak avangin heng ATM Card te Internet Banking te hi a tangkaiin mipui te pawh hian kan hmang tangkai hle a ni. Hetih lai hian heng ATM Card/Internet Banking kan hman hian kan pawisa kan khawih chevel ringawt emaw kan tih lai hian Card kan hman avanga Card neituten hlawkna kan neih let ve theihna awm hi a hria chu kan tam vaklo mai thei, hei hi State Bank Rewardz an tih chu a ni.

            State Bank Rewardz an tih chu State Bank Group ina SBI Service hmangtute tana hamthatna (Loyalty Programme) an siam pakhat a ni a, hemi hmang hian SBI Service hrang hrang hmangtute hnenah hamthatna/lawmman an siam thin a ni.

A hman dan: State Bank Rewardz ah hian State Bank Service i lei/hman apiangin rewardz point i nei zel a. SBI Card hrang hrang hmang emaw internet Banking kaltlanga pawisa i lakchhuah emaw, transaction i siam emaw apiangin Rs 200/- hu i hman apiangin Rewardz point 1 i nei zel dawn tihna a ni. Chu rewardz point chu kan duh hunah pawisa ah chantir leh theih a ni a, point 4 zel hi Rs 1 a ni (Point 120 nei ta ila Rs 30/- kan nei tihna anih chu).

Member nih dan: State Bank Customer te hi chu State Bank Rewardz ah hian member an ni nghal a, amaherawhchu anmahnin an in register loh chuan point te hi hman theih a ni lo thung. In register tur chuan internet kaltlangin www.StateBankRewardz.com ah emaw Android leh iOS a State Bank Rewardz Mobile application te download in in register mai theih a ni.

Rewardz Point hman dan: Heng Rewardz point te hi kawng hrang hranga hman theih anih rualin a pawisa a lakchhuah theih erawh a ni lova, a hnuaia service tarlan hrang hrang atan te hian hman theih a ni thung.

            Mobile and DTH Recharge

            Entertainment products, Electronic items

            Family, Home, Fashion & Beauty products

            Movie tickets

            State Bank Gift Cards

            Gift Vouchers

            Airline tickets

            Bus tickets

            Music download

           

Heng Rewardz Point te hi thla 36 chhung a dam a, thla 36 chhunga kan hmang/claim lo anih chuan a hnuah a hman theih tawhloh.

            He Rewardz Point hi SBI a transaction siam thin te tan a tangkai hle a, cheng khatmah sen ngai lovin heng kan point khawlsa hmang hian thil a lei leh theih a ni. (Kei ngei pawh hian he Rewardz Point kaltlang hian Mobile phone te a thlawnin ka neih theih phah tawh a, top up thun nan te ka hmang thin nghe nghe). Chuvang chuan State Bank dawr thang te tan chuan State Bank Rewardz ah hian in register a tha hle a ni.

-          Laldinpuia

Secretary, Serchhip District Consumer Association