Aadhaar leh Mobile number thlunzawm

Consumer te I harh ang u XII

            Ni 6 February 2017 khan India rama rorelna Court sang Supreme Court chuan India rama mobile connection nei thar tur reng rengin Aadhaar Card hmangin an Booked vek tawh tur a ni tih a passed a, hemi rual hian mobile number nei tawhsa te pawhin he thuchhuah atanga kum khat chhungin Aadhaar nen an number hi an link (reverifiaction through Aadhaar based E-KYC)tha vek tur a ni(Writ Petition (C) No 607/2016) tih a ni a. Hei Aadhaar number leh Mobile number inthlunzawm tur kan tih lo chhuah dan chu a ni. Hemi hnuah hian India rama telecom lama thuneitu sang Department of Telecommunication (DOT) chuan thuchhuah siamin India rama mobile service provider zawng zawng te chu kum khat chhunga an subscriber te mobile number leh Aadhaar number thlunzawm vek tura tih an ni ta a(File No. 800-26/2016-AS.II dated 23.03.2017). Huntiam chhung hi Feb 6, 2018 thleng a ni a, tichuan he thupek zawm hian India rama mobile srvice provider hrang hrang te chuan an subscriber te Aadhaar leh Mobile number thlunzawm tur hian hma an la chho ta mek a ni.

            DOT thuchhuahin a tarlan dan chuan he mobile number reverification tihdan leh a kaihhruaina tlangpui chu hetiang hi a ni ang:

1)     Service Provider ten an subscriber te an hriattir ang a, hei hi SMS hmangin emaw, an website-ah tarlangin emaw, electronic leh print media hmangin hriattirna hi an subscriber te an pechhuak ang. (Tunah hian India ram pumah Airtel leh Idea chiahin reverification process hi an la kalpui a, service provider dang hian hma an la la lo.)

2)     Mobile subscriber ten an Aadhaar Card ten anmahni retailer/distributor-ah reverification hi an ti ang a, E-KYC anih avangin document submit a ngailo a, amaherawhchu Aadhaar based rerevification anih avangin anmahni ngei inlan a ngai a, an fingerprint hmanga process tur a ni ang. Online hmanga tih theih a ni rihlo.

3)     Mobile number pakhat aia tam hmang tan buaina tur a awm chuanglo a, Aadhaar card pakhat hmangin mobile number chi hrang 7 thleng reverification hi tih theih a ni.

4)     Reverification hi an Mobile number a SMS Code an dawn atanga tih tur a ni a, Mobile number thenkhat Data Services atan chauha hman a awm thei a, hetiang tan hian he an Data Card atana an hman mobile number verify tur hian anmahni Mobile number hman laiah alternate code for reverification thawntir theih a ni ang.

5)     Tunhnaia Aadhaar hmanga sim card book, finger print hmangin E-KYC ti te tan reverification hi tih hran a ngailo bawk.

6)     He Mobile number leh Aadhaar thlunzawm hi ni 6 February 2018 thleng hun a awm a, chuvang chuan hmanhmawh lutuk erawh a ngailo ang.

7)     He Aadhaar leh Mobile number thlunzawm nan hian phone company ten mipuiah pawisa cheng khatmah an la tur a ni lo. He reverifcation hi a thlawn a tihtur a ni a, sum senso tul ang a awm anih pawhin mobile service provider te lam ngaihtuah tur a ni ang. Hetiang tih nana sum lo la an awm anih chuan anmahni awmna hnai ber Consumer Forum-ah complaint tur a ni.

8)     He Mobile number reverification hi mobile number nei zawng zawng tan tih ngei ngei tur a ni a, kan tilo anih chuan ni 6 February 2018 hnu lamah kan Mobile number kha a hman theih tawhloh ang.

9)     Hemi tih nan hian Aadhaar Card neih ngei ngei a ngai a, Aadhaar Card neilo tan reverification tih theih a ni lo ang.

-         Laldinpuia

Secretary

Serchhip District Consumer Association