DIKNA

"Aw mihring, tha chu a entir tawh che a ni; LALPAN a phut che chu eng nge ni? Dik taka tih leh khawngaihna ngainat leh i Pathian nena thuhnuairawlh taka len dun a ni lo vem ni?" Mika 6:8

 

     Dikna tih te, dik taka thiltih a tul zia te hi tunlai Kristian te kan inzirtir nasa ta khawp mai a, hei hian kan dik tawk tawhloh zia a tilang chiang hle awm e. Khawvel ina a buaipui em em chu Corruption a ni. Corruption avangin ram a mualpho a, mimal an mualpho a, sawrkar hotu lawk tak tak te pawh an mualpho thin. Bihar Chief Minister hlui Laloo Prasad-a pawh MP anihna atanga ban anih mai bakah tunah hian corruption avangin jail bang a zut mek a ni.

     India ram hi a bikin Corruption-ah kan hluar em em mai a, mithiam tena an chhut dan phei chuan mipui chanai tura sawrkarin a sum ruahman atanga za zela 85 ve hi corruption-ah a kal ral thin a, 15% chauh hi mipui ten an dawng pha thin niin an sawi. Mizoram te pawh hi Kristian ram kan inti tak na a Corruption lakah hian kan fihlim lo nasa hle. Tun hma zawng chuan Mizo te hi Lal thuhnuaiah kan awm thin a, ram buai kan han hmachhawna, harsa ti tak chungin chhungkuain mahni eikhawp tur kan thawk chhuak a. Chutia harsa tak chungin thlansa phulkaia eitur kan dapkhawm lai chuan kum 1972 ah UT a hlankai kan han ni ta thut mai a, mahni fairelbel ring thin khan Central zem kan han zen ta thut mai a, kan awm thiam lova kan kal he hu hu ta mai a, kan hriat miah lohvin mahni chan aia tam duhna chuan kan thinlungah hmun a lo chang tan ta a. 

     Dikna a fam ta, felna a tlawm ta!

     Nun suar ang a chim,

     Tham leh bawlhhlawhna ten tual an leng awi maw a pawi em mai...

     tih hla phuah a lo ngai ta hial a ni.

Dik taka thiltih ai chuan kan hlawkna anih dawn phawt chuan dikhlel deuh hleka thiltih duhna chuan  kan ram hruaitute a hmin thlu ta zawk a. Chu chuan mipui chanai tur a hotu lawk zual deuh tena lo fanghma no ei mai chu pawi tih lohna lian tak a hring chhuak a, corruption chuan namen lovin kan ramah bu a rawn khuar ta a ni. Kum 1987-a State a hlankai kan nih hnuah, langsar taka mipui chanai tur corruption avanga kan hloh hi cheng nuai 23,000 a tling tawh a. Hna thawh that loh avanga project lian pui pui kan tihhlamzuih avanga kan sum hloh hi cheng nuai hlira chhiara 1,18,515 a tling tawh a ni.

     Hetiang khawpa corruption in min tihbuai tak avang hian kan thlarau nun a chuai a, kan Kohhran a kal dikhlel fo thin. Chuvang chuan kan Kohhran hruaitute pawh hian hei hi an vei em avangin theihtawpin Kohhran mite hi dikna vawngnung turin min zirtir awllo a ni.

     Kan chhehvel te hi han thlir ila, hmun tin maiah diklohna hmuh tur a awm ta mai te hi a veiawm ta hle mai. Kristian tam tak te pawh hian dikhlel deuh hleka thiltih hi kan duh ta zawk emaw ni chu aw tih tur a awm ta fo mai. Rorelna dik duhtu Pathian hian engtin nge min ngaih ang le aw... ka ti thin. Kristian ram inti site hian India rama ringlote mithmuhah diklo takin thil kan ti ngam ta mai te hi a mak ka ti thin. In chik ve ngai emaw, Mizo te hian India ram huapin infiamnaah te thang kan chhuah ka fo va, U-19, Subroto Cup, U-21 tih vela India rama Champion thin Mizo player te hi han en hian U-19 chu an ni theilo mawle, an pumrua leh chezia ah hian U-19 chu an ni hauh lo, mahse engtinnge U-19 a an khelh theih? A chhan ber chu dawtin diklo takin Birth Certificate an siamtir chawp tihna a ni. Heng mite hi a hnam huapin kan chawimawi thin lehnghal, Pathian hian engtin tak ngai ang maw?

     BPL list a tel te hi kan chak em em a, tel thei kan ni ngawt em tih te hi kan ngaihtuah a ngai. Central sawrkar ina BPL list a tel tur a a tih te chu mahni pawh inchawm zo lo khawp a rethei te an ni, BPL list a awm ngat te hi an retheih avangin khawtlang leh Kohhranah pawh inhmang hmanlo tura ngaih an ni. Keini ve thung chu BPL list a awm siin mobile phone nen, Coat suit nen, Cigarette man to chi nen kan leng a, a awmzia hi kan man lo hle a ni. BPL list a awmlo tur tawp hi BPL list a awm tam tak kan awm.

     Kan sawrkar chuan thing tlanga loneimiten kum tina ram zau tak tak vat darh a lo kan nei thin chu nakinah kan thing leh mau tan a tha dawn lova kan ram hi a la chereu mai dawn a ni tiin loneimi ten eizawnna ngelnghet an neih theih nan NLUP a duang chhuak a, mahse hei pawh hi kan hmangdiklo leh nasa hle.  NLUP dawng tam tak hian NLUP in a tum pawh hi kan hre bar hlawm lo, Congress sawrkar in a thlawna a party mi leh sa te tana a sem emaw te kan ti mai mai tawh anih hi.

     Mahni nih phakloh nih talh kan tum vang tein dikna hi kan vawngnung zo lo fo thin. Matric pass silo Matric pass certificate neih talh tum te, Birth Certificate tih danglam talh tumte hi Pathian lawmzawng a ni angem? Mahni nihna anga lang ngamlo Kristian te hian hnamdang ho hmuhah hian kan Pathian hi kan tithangtlawm hle mai. Ringlomi chuan diklo takin lo ti rawh se, mahse keini Kristian te chuan diklo takin thil i ti ve lovang u.

     Hetianga diklo taka thiltihna hi kan India ramah hian a tam em em avangin hemi venna tur hian India sawrkar chuan dan thar a siam a, chu dan thar hnuaiah chuan India khua leh tui zawng zawngin chhinchhiahna number (Unique Identification) kan neih tur a duangchhuak a, chu chu Aadhaar an tih hi a ni. (Aadhaar chungchang hi chipchiar zawka zir a chakawm khawp mai). Hei hi India khua leh tui tan chuan neih ngei ngei chi a ni a, hei hian diklo taka thiltih zawng zawng hi a veng thei dawn niin mithiam te chuan an sawi a ni.

     Kan Pathian chuan rorelna dik a duh a, rorelna dik a awm theih nan a zawlnei te hmangin thuthlunghlui hunah pawh khan a lo auchhuak fo tawh thin. Diklo taka thiltih hi Pathian huat zawng a ni. Pathian chuan amah nena lengdun turin min ti a, chumi amah nena kan lendun theihna tur chu dik taka thil kan tih hi a ni. KTP member te hian dik takin thil kan ti ngam angem? Nge midang pawh an dik bik chuang lo tiin an hnung kan zui zel mai dawn? Sam ziaktu chuan, "Thil thalo ti tu te avangin intilungngai duh suh la, fello taka ti te chu awt hek suh' a ti (Sam 37:1).  Thil thalo titu te hian min thunun fova, anmahni avangin thiltha tih talh talh pawhkan peihlho phah fo va, chu chuan diklo taka thiltih naah min hruailut thin. Hawh u, thilthalo titu te avang hian i buai lovang u, keimahni hian kan thlen chinah hian thiltha i ti mai ang u. Mahatma Gandhi-a chuan, 'Danglamna midang chunga thleng tura i duh chu nangma chungah thlentir hmasa phawt rawh' a ti. Keimahni hi kan pawimawh a, dik taka thil kan tih phawt a ngai. Kan chhungkua, kan Kohhran, kan khawtlang, kan rama rorelna dik leh fel kan duh anih chuan keimahni hian khua leh tui tha kan nih a, dik taka thil kan tih phawt a ngai a ni. Chuvang chuan Kristian te hian kan thlen chinah hian dik takin thil i ti ngam ang u.

-   Laldinpuia